منقول
لو بصيت ع شخصية لوسي ابن طنط فكيهة وإخراجها أنها هايفة ومالهاش لازمة ومحل للسخرية والتنمر ....حتلاقي انه العكس تماما وكان احسن شخصية في الفيلم
متعلم في أوروبا من وهو صغير ...بيجيد أكثر من لغة ...مثقف فنيا عارف كل الاغاني الاجنبية بكل اللغات
الوحيد اللي كان بيشتغل حاجة بيحبها ومحقق شغفه وعايش حياته ومبسوط .....يعني بيشتغل مدرب رقص وواخد ماجستير فيه من أوروبا وبيكسب كتير وبيلف أوروبا وأهله أصحاب ثروات ....عنده إمكانيات شخصية وعائلية تمكنه بكسب اضعاف ما يكسبه حسين في الوظيفة.
فين الهيافة والفشل ؟
البنات كلها بتحبه ....وشخص لطيف و زوق ويوسف وهبي دايما يوصفه بابن طنط فكيهة......عشان هو لطيف بيحب امه وقريبته .....ودايما يقولها كلام حلو .....عكس عمر الشريف اللي كان جلنف وقليل الذوق ومش بيعرف يعامل اي ست كويس حتى مرات عمه.
لوسي كان ع علاقة بكل نخب البلد ومشاهيرها .....وكان صديق شخصي لحارس منتخب مصر ....يعني شخصية تستحق الثقة اكيد مش هايف ولا حاجة.
هو الوحيد اللي كان مش مصدق علاقة حسين بهند رستم.....يعني واحد عنده ذكاء اجتماعي مش ساذج ولا تافه عكس كل اللي صدقوا القصة ورددوها.
وهو اللي كشف الكذبة بعلاقاته مع المشاهير .
شخصية لوسي بتوضح تفاهة المجتمع هنا مش تفاهته.....اللي هو مهما حققت في حياتك الناس مش حتحكم عليك غير بشكلك الخارجي
يعني هو كان اصدق واحد في الفيلم ....متعدد العلاقات النسائية وبيعلن ده .....عكس عمه اللي كان بيحتقره وهو كان بيخون مراته في السر وبينافقها وهو مش طايقها وعمه نقل ده لابن اخوه ويقوله اتدردح .
خليك راجل محترم في نظر المجتمع ....تبقا جلياط وخاين وبتختار أي واحدة تتجوزها والسلام وتخونها مع الف واحدة في السر .....بس ارسم صورة يحبها المجتمع عنك بقا .
اوعى تلبس قميص مشجر ملون ....انت كدا مش راجل كويس .
منقول
الكلام دا غريب ع مجتمعنا جدا واول مره اسمع وجهة النظر دي بالشكل دا ايه رأيكم في الكلام دا
هل دا سم في العسل ولا ايه
انا مستغربه الكلام دا بجد !!!!!!
لا حول ولا قوة الا بالله
انا شوفت البوست دا منتشر جدا الفترة الأخيرة على صفحات كتير وهناك معارض ومؤيد
البوست دا بيستهدف العقول وليه عمق مش حكايه فيلم كوميدي ضحكنا عليه وانتهى
وليه يظهر بوست بيحلل فيلم قديم بوجهة نظر شيطانيه كدا
ودا فيلم من ايام الزمن الجميل كما يقال عنه
طب افلام الايام دي هيتقال فيها ايه
انا بطرح دعوى للنقاش الهادف عشان نعرف ليه البوستات بقت منتشره وايه الهدف منها بدل ما نحط راسنا في الرمال ونعمل نفسنا مش شايفينها لأنها زي المرض هينخر في عظام مجتمعنا
اللهم انك عفو تحب العفو فاعف عنا
اخشوشنوا يا شباب مصر فمصر لا تحتاج لاشباه الرجال
انها حرب عليكم وانتم المستهدفون