= انتي بتنكدي عليا ليه ؟
- عشان بحبك
= ايه الحب في كده يعني ؟
- يا حبيبي فوايد النكد كتير والله.. انت بس اللي عصبي.. متخيل حياه بدون نكد ؟! بدون زعيق وشتيمه وتهزيق وقفل سكة وبلوكات ؟! يا ديني علي الملل
= ملل ؟
- ايوة ملل .. هو لما كل كلامنا يبقي وحشتني وبحبك.. الست مننا هيبقي ليها أثر في حياه الراجل بعد كده ؟
= يا بنتي انا شاب صغير لسه علي الحاجات دي.. انا ودني بدأت تعمل أصوات غريبه من كتر العصبيه حرام يعني ..
- أهي دي حاجه تخليك دايما فاكرني وفي بالك
= انتي متخلفه ؟
- أه
= متخلفه ؟
- أه
= فى الشارع اللى وراه
- هقولك .. كل ما تحس بوجع في ودنك.. وصداع.. وضغط هتفتكرني
= منا هسبلك
- وات ايفر.. المهم اني حققت التارجت واستحوذت علي جزء كبير من تفكيرك .. قولي.. هتعرف تفكر تخوني وانت تعبان كده وقرفان ؟!
= لا.. معظم تفكيري هيبقي في ازاي اخلص منك
- هتحاول حتي تعرف واحدة تانيه بعد اللي عملته فيك ؟!
= لا كرهت أي حاجة مؤنثه .. شايفه الجزمه دي ؟!
- أه
= ودين والدتي ما هلبسها تاني .. هجيب كوتش مذكر
- وده برضه تحقيق للتارجت .. كده مش هيجيلك خلق تعرف واحده غيري
= منك لله
- وفي نفس الوقت مش هتقدر تعيش وحيد كده لقيط .. لازم أنثي في حياتك .. اللي هو أنا يعني
= هتحدي نفسي وأعرف غيرك
- مش هتستحمل لسه ملل بدايه العلاقات .. انت كسول يعني وبتزهق بسرعه منا عارفاك .. مفيش قدامك حل غيري
= هي تلبيسه يا بنتي ؟!
- متفهمهاش كده.. الغايه تبرر الوسيلة .. لازم أخش أفلي لايكاتك لايك لايك.. أفلي اللوفات علي صورك لاف لاف.. وأدخل أكونت كل ممحونه عاملالك لف وأشوفك عاملها لافات انت كمان ولا لأ
= وليه تضيعي كل الميجات دي يعني وتخلصي باقتك ؟!
- ده إدماني يا حبيبي .. لازم أشمشم كل يوم علي حاجة أنكد عليك بيها وإلا هتروح مني
= هروح فعلا .. هروح خالص
- بس متنساش لحظاتنا السعيده سوا
= هي اللحظات دي اللي مصبرانيي عليكي
- ساعات الصفا.. واوقات الوفا .. وسراير الدفا .. واللعب في القفا
= قفا ؟!!
- سوري هي جت كده مع القافيه .. بفكرك بالجانب الوردي من حياتنا
= أموت في الوردي
- يا ولا
= فاكره الوردي ؟! .. والبمبي ؟!
- اختشي
= بحبك
- لا بحبك إيه .. مين سارة اللي عاملها لايك دي يا وسخ ؟! ها ؟! مش ماليه عينك انا صح ؟!!
_